Vivekanandaswamikalute Bharateeyaprasangangal (Malayalam)

അജ്ഞാതസന്ന്യാസിയായി ഭാരതം വിട്ട് നാലു വർഷങ്ങൾക്കുശേഷം ശ്രീരാമകൃഷ്ണന്റെ മഹാനായ ശിഷ്യൻ സ്വാമി വിവേകാനന്ദൻ 1897 ജനുവരി 15-ന് കൊളംബോയിൽ കപ്പലിറങ്ങി. ആ ഋഷിവര്യന് ജനങ്ങൾ അത്യുജ്ജ്വലമായ വരവേൽപ്പു നല്കി. നാട്ടിൽ കാലെടുത്തുവെച്ചതുമുതൽ അദ്ദേഹത്തിന്റെ യാത്ര വിജയഘോഷയാത്രയായി മാറി. എല്ലായിടത്തും ആഹ്ലാദോന്മത്തരായ ജനക്കൂട്ടങ്ങൾ സ്വാമിജിയുടെ നാവിൽനിന്നുതിരുന്ന വാക്കുകൾക്കായി തിങ്ങിക്കൂടി; യുവാക്കളും, രാജാക്കന്മാർപോലും, അദ്ദേഹം കയറിയ വണ്ടി വലിച്ചു. ജീവിതയുദ്ധഭൂമിയിൽനിന്ന് അണുവിട പിന്തിരിയാത്ത സ്വാമിജി തന്റെ വിജയമുഹൂർത്തത്തിലും മാറിനിന്നില്ല. എത്തിച്ചേർന്ന സ്ഥലങ്ങളിലെല്ലാം അദ്ദേഹം പ്രസംഗിക്കുകയും തനിക്കു കിട്ടുന്ന ആദരവെ ല്ലാം അനാദികാലംമുതൽ ഭാരതം മാറോടു ചേർത്തുവെച്ച മഹനീയാദർശങ്ങളോടുള്ള ആദരവാണെന്നു പറയുകയും ചെയ്തു. ഈ പുസ്തകത്തിലെ പ്രസംഗങ്ങൾ ആധുനികഭാരതത്തിന്റെ പ്രമാണമാണ്. ഉണർന്നെഴുന്നേറ്റ് പ്രവർത്തിക്കാനുള്ള ആഹ്വാനങ്ങളാണവ; എന്നത്തേക്കാളും ഇന്നാവശ്യമായ ഉണർവ്വ്.